政情：中環出更：「吸水」英偉 浸大受惠
全球經濟麻麻哋，商界大孖沙捐錢都無咁爽手，但來自商界嘅浸會大學基金董事局主席王英偉（Wilfred）就似乎有啲計，「吸水」有方。浸大喺第六輪配對補助金計劃中，成功籌得港幣三億八千一百萬元，並獲得政府配對補助金港幣二億八百萬元，打破歷年籌款紀錄。
基金日前舉行年度感恩茶敍，並慶祝成立六周年，會上宣布籌款喜訊。Wilfred與逾百位基金董事局成員及大學友好齊現身。Wilfred致詞時連稿都唔使睇，原來係專登嘅，佢自嘲年屆花甲之年，為免患腦退化，致詞時刻意唔望稿，逼自己記多啲數字，認真幽默。
力邀陳新滋入基金
浸大籌款爆燈，背後功臣唔少，今年六月底退休嘅浸大校長陳新滋都有份發功。佢上任至今，私人捐咗超過港幣三百萬元畀浸大，唔知係佢幾多個月嘅人工呢？咁抵得諗，Wilfred點會放佢走，邀請佢退休後加入大學基金，幫手籌款喎。
卓妮同場仲見到基金副主席王國強及大仔王紹基。紹基同浸大都幾有淵源，話說佢當年留學返港想進修，見浸大離公司最近，於是報名讀工商管理碩士，畢業後做埋校友會委員添。
浸大基金另一副主席、著名建築師呂元祥都畀面到場，佢身為西九文化區（藝曲）總建築師，講起西九工程時，慨嘆當前挑戰已不是技術問題，而係工程中標後政府向立法會申撥嘅時間愈來愈長，加上近年建築成本快速上漲，咁先至難解決喎。
卓妮