【本報訊】「想知道個真相，邊啲醫生負責任，（涉事者）出嚟講番句公道說話。」死者陳宛琳的丈夫楊先生，事發後兩年多以來一直感到無奈無助，妻子的離去令他心情跌至谷底，至今仍「放唔低」，只希望透過審訊查出事件真相，為妻討回公道：「點解畀人氹咗去打毒針？點解畀人呃咗咁多錢？」他又認為警方及政府部門調查進展緩慢，但最終亦有了突破性進展，令他心情「好番少少」，他會告慰太太亡靈，望她能得以安息。
死者陳宛琳生前助丈夫在灣仔譚臣道經營「明記美食茶餐廳」，事發後楊先生和家人飽受精神折磨，他每次拿起妻子舊照都不禁流淚。「都會好掛住太太，發夢見到佢呀！」他坦言，妻子去世後，曾想過結束茶餐廳生意，全力處理太太的案件，但深思熟慮後，有感案件或無了期，不可以「停晒手」，最終堅持開業。他相信要回復正常生活，需要慢慢適應，但慶幸家人的支持為他帶來動力。
楊昨指，涉事公司事後一直無人聯絡過他，他對整件事充滿疑問：「作為丈夫都唔知發生乜事，我只知（妻子）去做facial，命都冇埋。」他稱多年來期待調查進展，「驚佢哋（警方）丟淡咗，驚佢擺低咗三五七年，分分鐘十年。」警方昨終採取行動，心情稍為「好番少少」，他指案件已進入司法程序，會交由法庭及警方處理，「但起碼有個進展……還一個公道畀佢。」楊稱，未來的目標是養育一對子女，以還太太的心願，「養大啲細路，供佢哋讀書，等佢哋成材。」
任職貨車司機的茶餐廳熟客岑先生說：「（東主夫婦）以前大癲大肺，夫妻倆齊闖天下，最佳配搭啦！」但事發後楊變得沉默寡言，「男人將呢啲擺喺心度，好少提。」餐廳員工盛讚陳宛琳是好「事頭婆」，「非常掛住老闆娘」，雖然事件已過兩年，但不時觸景傷情。
協助楊家的立法會議員麥美娟指，會按警方資料，協助家屬向醫務委員會投訴涉事醫生及涉事醫療美容集團的負責人，稍後亦會處理索償安排。她希望是次檢控能夠對業界起阻嚇作用，避免悲劇再發生。