政情：中環出更：大劉要用四腳拐杖行路
華人置業前主席劉鑾雄（大劉）因涉及澳門巨貪案而被澳門初級法院判監五年三個月，佢已申請上訴，但仍未排到期。上星期我哋見到大劉頭耷耷、趷吓趷吓咁去灣仔富豪飯堂用膳，一度要由女兒劉秀融及女友甘比攙扶先落到樓梯。事隔一星期，大劉嘅腳患似乎未有好轉，反而有惡化迹象，尋日仲要用四腳拐杖輔助行路添，唔通擔心單官司所以腳患加劇？
頭耷耷 動作緩慢
尋日大劉如常喺中午時分乘座駕到灣仔富豪飯堂開餐，並由四名保鏢在旁守候。大約兩個鐘後，佢同甘比、秘書一齊離開。我哋留意到大劉篤住支四腳拐杖，行起路嚟似乎唔係咁方便，尤其係落樓梯時，佢仲捉到甘比隻手實一實。我哋上前問佢隻腳咩事啦，但佢就無理會，只係耷低頭專注落樓梯。雖然大劉架七人車泊咗喺門口，但佢都花咗啲時間先行到去，上車時動作亦十分緩慢，最後佢同甘比乘車離開。
卓妮