政情：建制拗票「民」「工」互片
每逢選舉前夕，各黨派間為派人出選都會出現鬼打鬼爭位，建制派都唔例外，一樣爭餐死。明年立法會選舉，基於人口增長變化，港島區會由七席減至六席，而九龍西就由五席加到六席。由於呢兩區選情好浮動，一旦真係改動，勢必觸及建制派利益板塊，工聯會（工記）同民建聯（民記）呢兩大黨，如果最後傾唔掂數，隨時重演互相廝殺「鎅票」場面，大家係時候買定幾斤花生等睇戲。
郭偉強選情危危乎
港島區向來係泛民主派傳統票倉，但一二年選舉建制派有突破，七席中搶佔四席，如果下屆港島區由七變六，建制派要保住四席已經無乜可能，但部分建制派仍然唔驚，民記議員鍾樹根就話驚都未驚過，而新民黨主席葉劉淑儀講到明，該黨一定派人出戰港島區，就算佢唔選都唔會讓個位出來。
咁到底最受影響會係邊個？按上屆得票情況推測，工記王國興得票最低，應該係最勢危嗰位，隨時被踢走。有傳聞話工記打算派勞工界議員郭偉強轉攻港島區直選頂替王國興，如果傳聞屬實，睇怕郭偉強嘅選情真係凍過水。不過，政治嘅嘢一日都嫌長，郭偉強仲有一線生機，因為港島區議席萎縮，建制派有可能僅得三席，到時民記係咪仲大條道理霸住兩個議席呢？應該仲有得傾。
傾掂數都要睇對手
不過，如果工記喺港島區真係無肉食，都唔代表九龍西多咗嘅議席，就屬於佢哋。如果大家記得嘅話，一二年選舉工記本來派出周聯僑出戰九龍西直選，但後來顧全大局下被勸退，結果成就民記蔣麗芸做票后。事隔幾年，蔣麗芸氣勢如虹，得票分分鐘高過上屆，到時民記會否乘機搶攻兩席，抑或乖乖哋將新增議席拱手讓予工記，仍然係未知之數。
即使建制派內部傾掂數都好，始終都要睇吓對手嘅，好似九龍西地頭蟲民協，一二年選舉派出名氣較差嘅譚國僑都係輸少少，如果來屆九龍西增加多一席，加上民協變陣派出廖成利，好大機會贏末席入立法會，所以建制派都唔好咁老定呀！