居民亂餵飼 興田爆鴿患

「啲鴿糞、鴿毛滋擾到我衫都唔敢晾，仲帶埋啲鴿蟎入屋，咬到成身一粒粒！」戴小姐入住興田邨逾年，發現邨內野鴿極多，就連家居亦充斥不知名蟲類，送交食環署檢驗後證實為蟎蟲，並指或來自野鴿，先後三次聘請滅蟲公司處理仍無法驅除蟲害。

孳生蟎蟲 滋擾民居

為杜絕蟎蟲入屋，戴已自行堵塞冷氣機槽罅隙，「要封晒冷氣機個邊位，唔再開窗，啲蟲就冇再出現過！」戴指邨內居民及冬菇亭食客有餵飼野鴿習慣，導致野鴿為患，曾向食環署、房屋署及管理公司求助皆不獲理會，令戴極為無助，「食環同房署話租置屋唔關佢事，管理公司又只係勸喻人唔好餵鴿，咁又有乜用？」

有居民擔心小朋友嘗試捕捉野鴿會增加感染禽流感機會。

邨內四周已有張貼「切勿餵飼野鳥」告示。

公契條文 未列禁餵

食物環境衞生署與房署發言人皆指租置屋已設立法團管理屋邨，着記者自行向管理公司查詢。興田邨管理公司發言人指出，大廈公契未有條文禁止任何人士在屋邨公共地方餵飼野鴿，職員只能積極勸喻住戶。就熟食亭食客餵鴿一事，發言人強調已安排職員加強巡邏，並勸喻食客停止餵飼野鴿，情況亦略有改善，另已聯絡漁護署擺放捕鴿籠以改善情況。

居民心聲 黃太：「見過好多次啲人餵鴿，搞到啲鴿都唔驚人，仲愈嚟愈多，都驚啲鴿有禽流感！」

居民心聲 李太：「好多時晾啲衫出去，搞到啲衫都有鴿糞，如果仲有人餵，都仲係咁多野鴿！」

當區區議員陳汶堅坦言，近月鄰近地區接連有禽流感感染個案，令居民人心惶惶，由於興田邨已列入租置計劃，食環署與房署接獲投訴後，一般只轉交業主立案法團跟進，有欠阻嚇力，「其實興田邨野鴿問題都成十幾年，法團多數都係勸喻或者貼通告提醒唔好餵鴿，亦試過派職員認出邊個餵，畀封警告信佢，但如果要再增加阻嚇力，告到上法庭又好複雜！」

立法會議員王國興狠批食環署失職，認為涉及公眾衞生事宜，當局都有跟進、執法及檢控責任，不能單靠無實權的屋邨業主立案法團自行處理，「野鴿有可能會帶菌，法團可以加強宣傳同教育居民唔好餵鴿，但要對違規餵鴿嘅人執法，食環署係絕對責無旁貸，唔可以話係私人地方就唔入邨做嘢！」

香港殺蟲業協會公關主任蔡炳然指出，倘蟎蟲於密封冷氣機槽後消失，估計蟎蟲源自野鴿，並提醒市民，家中無故出現蟎蟲須留意周遭有毛動物，只要找出源頭，噴殺蟲水即可纖滅蟲患，「老鼠、貓、狗、白鴿都係身上有毛嘅動物，容易匿藏蟎蟲，搞好屋企衞生，杜絕蟎蟲源頭就冇問題！」

記者：黃芷君、詹海萍