香港都市陷阱處處，特別係危險招牌搖搖欲墜，梗有一個喺左近，市民出街一個唔留神，隨時「中頭獎」，唔係講玩o架。
呢，○八年灣仔道一間食肆嘅二百磅巨型木招牌突然倒塌，一名路過嘅婦人不幸被壓死，事後當局急急補鑊，下令清拆全港僭建招牌，又推出自願申報計劃，係威係勢，可惜姿勢大過實際，七年後嘅今日，情況唔單止冇改善，反而仲惡化咗添。
好似灣仔意外現場咁吖，本報記者最近去睇過，招牌冇錯係少咗，但據附近商戶講，其實街上仲有好多掛牆招牌「金玉其外，敗絮其中」，隨時冧得。最得人驚嘅係，雖然發生意外嘅食肆已經轉過幾次手，但招牌就唔知有冇換過，萬一再發生倒塌意外，後果真係不堪設想。
講到危險招牌，深水埗同樣係重災區。有招牌經過多年風吹雨打，早已甩皮甩骨；有舊樓連接懸臂式招牌，牆身不堪負荷而出現裂縫，險象環生。連註冊工程師都承認，單憑目測好難百分百確保掛牆招牌係咪安全。地區人士踢爆，類似嘅危險招牌好多都係「無主孤牌」，出咗事都唔知搵邊個負責。
真係諗極都唔明，取締違例招牌啫，又唔係登陸月球，點解咁多年都搞唔掂呢？講到尾，咪因為港產官僚冇做好自己份工囉。呢，○八年發生奪命意外後，當局清拆違規招牌雷厲風行，淨係第二年就拆咗超過六千個，可惜風聲一過，一切又回復舊貌，近三年總共只係拆咗三千幾個，相對全港數以萬計僭建或年久失修嘅危險招牌，簡直係九牛一毛。當局執法蝸行牛步，同草菅人命冇乜分別嘅咋。
至於所謂「自願招牌檢核計劃」，更加係得啖笑。屋宇署一三年推出有關計劃，點知截至去年八月只係收到七十二份申請，僅佔全港招牌百分之零點零六咁大把。計劃反應冷淡，一啲都唔出奇，正如業界人士話齋，自願招牌檢核計劃完全冇誘因，既冇清拆限期，亦唔使負刑責，商戶又點會積極參與吖。所以話，官僚坐喺冷氣房制訂政策，一味閉門造車，唔撞板至奇喇。
話時話，官僚胡混度日，敷衍塞責，搞到都市危機四伏，危險招牌只係冰山一角咋。日前有國際機構公布安全城市排名，香港話就話全球排十一位，成為中國最安全城市，其實只不過係虛有其名，塌招牌、塌樹，隨時可以殺人o架！
俗語話，行船跑馬三分險，估唔到今時今日都市陷阱處處，連出街都危險，唔通真係個個都要戴頭盔行騎樓底？