區議會選舉將會喺十一月舉行，無論係泛民定建制派政黨，都已經派出社區主任落區服務街坊。有白鴿黨之稱嘅民主黨尋日舉行社區主任交流日，黃大仙區議員兼立法會議員胡志偉就以追女仔比喻區議會選舉，寄語社區主任要好似深愛另一半咁愛區內居民，先至可以成功奪得對方芳心。
胡志偉以過來人身份，向社區主任傳授選舉心得。佢話做社區工作最緊要由心出發，如果做咗好耐都無乜居民認得，即係唔夠心機。咁點做先可以氹到選民投票呢？胡志偉話，男人真係要好鍾意個女仔，先至會肯諗計、花心思吸引對方注意，所以大家要好似追女仔咁去打選戰。佢愈講愈投入，話由於所有選區都已經「名花有主」，挑戰者無異於做「小三」撬人牆腳，所以難上加難喎！