政情：黃岳永日本買樓慳住宿費
近期唔少人都趁日圓匯價低去日本買樓，社企「加油香港」創辦人兼香港精神大使黃岳永（Erwin）前排去日本公幹時，就順便留多咗兩日物色心水樓盤，事關佢經常去日本公幹及旅遊，與其每次使錢租住酒店，不如趁低位買個物業，既可當投資又可以慳番住宿費，一舉兩得。
打算當民宿出租
Erwin話，佢正研究緊點樣將個單位物盡其用，除咗間中自住及租畀朋友外，仲打算用短期或度假公寓形式租出去。依家好多年輕人去旅行都鍾意揀住民宿，只要裝修型格靚仔，吸引力不遜於酒店。前排Erwin去韓國玩，見到當地民宿有啲「阿豬媽」（即師奶）喺度幫手整嘢食，又有地道景點推介，非常親切，所以佢都想將日本間屋搞得有特色啲。講講吓，Erwin話，如果香港都可以發展呢種風格嘅民宿，畀啲退休老人家可以多啲同年輕人接觸之餘，又可以多個收入來源，真係唔錯喎！