政情：預算案難逃拉布
財政司司長曾俊華（鬍鬚曾）將於本月底公布新一年度財政預算案，雖然有消息話鬍鬚曾會喺可觀盈餘下延續去年開始嘅「減甜」政策，但現時距離預算案公布唔夠一個月，社會上都似乎冇乜太大反應，莫非已消化咗有關消息？不過，有負責預算案嘅官員就唔係太樂觀，認為今年都係難逃泛民主派「拉布」命運，分分鐘好似去年咁拉到六月，令政府面臨財政危機，嚴重影響民生。
負責官員唔多睇好
近年議會「拉布」成風，而每逢預算案公布前夕，泛民更會事先張揚「拉布」策略。好似去年人民力量就話要求預算案向全港市民每人「回水」一萬元，否則會發動「拉布」。雖然有消息話鬍鬚曾今年會進一步削減各項一次性「派糖」措施，包括寬免薪俸稅、差餉、綜援及生果金「出雙糧」、公屋免租等，但社會上似乎仲係冇乜不滿聲音。
有人分析話，社會對「減甜」未有太大聲音，主要係因為經濟好，大家對紓困措施嘅需求唔大，加上政改進行得如火如荼，根本無心機討論預算案。咁係咪代表今年「拉布」機會冇咁高呢？有負責預算案嘅官員就唔多睇好，甚至用「大鑊」嚟形容添！事關預算案一般會喺四月交由立法會辯論，咁啱政改第二階段諮詢結果亦會喺四月出爐。估計泛民到時將會就預算案及政改進行綑綁式「拉布」，要求政府撤回人大常委會「八三一」決定，「拉布」情況可能比之前更為惡劣。
財政危機隨時重現
該名官員又預計，假如泛民真係就預算案發動「拉布」，建制派亦未必會好似過往咁為政府護航。因為區議會選舉將於年底舉行，明年又係立法會選舉，而鬍鬚曾打算推行嘅「減甜」政策中，最受影響嘅基層正正係建制派嘅票源。平時建制派喺政治議題上可以避重就輕，但一旦掂到民生議題，見到唔對路都冇辦法幫政府，因為始終要向選民交代。政府喺兩邊唔留手嘅情況下，真係咪話唔頭痕。
記得去年立法會「拉布」戰去到六月先落幕，幾乎令到全港綜援戶、十幾萬公務員同紀律部隊及長者生果金冇糧出，希望呢啲慘痛嘅歷史唔好再重演喇！