中環出更：泛民議員每人夾二千「嗌痛」
佔領行動結束多時，但仍然有好多手尾跟。自從佔中三子率先撤離金鐘佔領區後，佔領區所有開支就由學聯、學民思潮、泛民政黨同民間團體攤分，不過原來一直由民間團體幫手墊支部分款項，有關開支累計達十幾萬元。近日有關團體要求其他三方找數，結果廿三名泛民飯盒會成員每人要畀二千元。有泛民議員知悉後即時牙痛咁聲，估唔到區區二千蚊都可以令月薪成九萬元嘅議員咁肉赤，早知唔好搞佔領咪一亳子都唔使囉！
「佔後」費用攤分
去年十二月初，佔中三子撤離金鐘佔領區後，所有物資同義工都一併撤走，不過由於雙學、泛民政黨同民間團體決定唔會隨三子撤離，所以當時四方平台開會決定，佔領區其後所有費用由各方攤分。當時佢哋並無事先夾定錢，有團體就「拍心口」畀住先。
最近大家埋單計數，每方要攤分約四萬六千元，泛民政黨決定唔按黨除番條數，而係由廿三個泛民議員平分，最後訂出每人要畀二千元，但係竟然有泛民感牙痛，真係不可思議。
卓妮