人質：有咩驚呀
【本報訊】「尋晚諗住落嚟消夜啫，點知搞成咁！」淪為人質的溫耀華，本有溫馨家庭，惟與泰籍妻子婚姻亮紅燈，愛女又遠赴泰國讀書。他雖然有居所，但住得不開心時，便會落街到英皇道近糖水道的行人天橋找露宿朋友聊天玩樂，過去兩日亦在上址歇腳，「住喺屋企唔開心，間唔中探下啲朋友，歇下啫，冇瞓。」詎料昨凌晨在露宿床位與朋友玩紙牌時，突然被另一名露宿者持刀挾持，他嚇得目瞪口呆，事後仍心有餘悸，惟稱：「有咩驚呀！人生總要死一次！」
稱與疑犯相識僅兩月
溫耀華與被捕男子不約而同名為「阿華」，相識僅兩個月，溫形容是「普通朋友」，平日甚少交談。事發時，他正與朋友玩紙牌，突然見阿華「摷身份證摷到亂晒龍，喺度走來走去，摷唔到喺度（溫的床上）攞把刀，都唔知邊個嘅，就箍咗我出去。」當時有大批警員包圍他們，溫亦不敢出言相勸，「驚都冇計呀！我唔敢出聲呀，畀佢拉咗落去呆咗啦，佢攞住把刀呀！」
其後溫被拖至新都城大廈對開英皇道，警員拔槍勸喻，「阿Sir勸佢返入行人路，勸佢放低把刀，勸咗幾個字，最後阿Sir拔槍，叫佢放低把刀，佢真係放低把刀，成班人衝埋去，佢冇得反抗。」始結束驚險的持刀挾持人質事件。
溫並無被刀割傷，但右手手指擦傷，送院治理後前往警署錄口供，折騰至清晨五時才返回行人天橋休息。問及他為何不回家，他稱：「今日放假，始終有頭家，會返屋企，仲有一個女要養。」