財神爺派錢，照計應該大受歡迎，皆大歡喜至係，偏偏港府派錢派到爭議不絕，添煩添亂，真係唔到你唔服。
係咁嘅，港府一三年向十八區區議會分別發放一億元，推行「社區重點項目」計劃，原意係繞過官僚程序，提高行政效率，加快地區建設。點知隨着各區工程陸續曝光，問題愈來愈多，反對聲音愈來愈大。好似沙田區議會咁吖，計劃斥資八千萬元喺城門河上游興建一個五人足球場，結果惹來劣評如潮。正如街坊話齋，步行一分鐘就有另一個七人足球場，唔知起嚟做乜。有地區人士狠批同類設施重複建設，冇嗰樣整嗰樣，簡直嘥錢。
講到嘥錢，又點止咁少吖，大埔區議會豪花五千五百萬元，喺林村許願樹廣場大興土木，包括以一千萬元加設「許願樹屋」，以及用一千萬元興建五間度假屋，點知被質疑冇諮詢公眾，萬一度假屋入住率唔理想，最終又係由公帑埋單，盞淪為面子工程。嗱，十八個區議會一共提交咗廿七個項目，五花八門，無奇不有，唔少淪為大白象，你話係咪弄巧反拙吖？
退一步講，即使有啲項目有實際需要，好似加強社區健康服務、改善社區廣場等等，但真正效益有幾多，實在令人懷疑。事關當局「派咗錢就算」，之後點運作就關人個關，咁搞法，再好嘅計劃都嘥氣啦。
即係咁，以往地區建設由政府部門主導，經常閉門造車，唔少工程脫離居民實際需要，而「社區重點項目」改為直接撥款畀地區自己搞，原意無疑係好嘅。問題係，當局撥咗款就闊佬懶理，結果咪問題多多，笑話百出囉。
話時話，地區工程淪為大白象，只係基建亂象叢生嘅縮影咋。大家有眼見，近年嘅工程規模愈大，拖得愈耐，超支愈多，除咗因為社會泛政治化，政客阻頭阻勢，最重要都係港產官僚冇做好份工。好簡單啫，港府連最基本嘅規劃都求求其其，甩甩漏漏，搞到多個工程同一時間上馬，淨係今年就有十一個之多，結果自己打自己，推高造價，有咩法子唔搞出個大頭佛吖。
所以話，納稅人真係無辜，基建工程唔係超支就係得物無所用，識印銀紙都唔掂喇。最離譜係，港府呢頭浪費公帑，嗰頭預算案又話要「減甜」，善財難捨，冤枉甘心，唔激起民怨至奇喇！