明末清初大思想家顧炎武指做人應警省於「松柏後凋於歲寒，雞鳴不已於風雨」，要保持獨醒嘅節操；而一個有為嘅政府，也應保持獨醒嘅節操──關心民生、真正急市民所急，而不是下下吹水「民生無小事」，經濟好轉，第一時間諗到嘅──都係為自己個錢包着想。
政府早前，那邊廂在深夜發出新聞稿，以香港經濟已經回復，決取消○九年因經濟不景氣，特首、問責官員及行政會議成員自願減薪百分之五點三八嘅安排，重回二○○二年水平，二月一日起生效，大家笑呵呵齊齊加薪。
好喇，這邊廂庫房水浸，下月二十五日公布嘅財政預算案，據講不但不會「加甜」，反而對基層民生嘅「派糖」分階段「減甜」，連公屋免租一個月都話要削；鬍鬚曾呢位人工高過美國總統嘅「中產」，睇法國電影歎咖啡食熱辣辣蝦餃之餘，真係虧佢夠膽死「減甜」如此兇狠！
講真，佢年年估錯數，年年預算案「派糖」紓困，雖說沒有甚麼新意，之不過佢又冇乜新思維，又不懂得如何投放更多資源在長遠嘅扶貧政策及改善民生策略上。
家陣「經濟好轉」，帶頭加薪快人一步嘅係一大班高官，而政府卻扭盡六壬，不是為基層、中層市民紓困，加碼派糖，還富於民，卻一味諗縮數，咁嘅政府，見微知著，點會有民望啊！
反之，經過佔領運動一役，民生更形凋敝，此時此刻，庫房水浸，政府既然乜長遠計劃都冇，最好就係開倉派現金，每人一萬最實際，咁就真係幫到基層嘞！既然政府話經濟已經回復，班高官拿拿臨重回○二年水平嘅薪酬，咁，早前取消嘅電費補貼、薪俸稅及差餉寬免額減半等，理應重回之前嘅紓困水平，讓基層再嘗失去的「少少甜」，否則政府難逃肥死自己瘦瓜基層嘅唾罵！