中聯辦將會喺下星期三傍晚舉行新春酒會，所有建制派立法會議員都獲邀出席，當日適逢立法會要開會，包括討論由工黨何秀蘭（阿Cyd）提出有關要求撤銷人大決定，重啟政改五部曲嘅議員議案。
有泛民亦已揚言到時會不停要求響鐘，等班建制派疲於奔命。不過據聞建制派一早已經諗定對策，到時會分批出席酒會，確保唔會因為去晒酒會而出事。
今次中聯辦酒會同立法會大會撞到應一應，聽聞唔少建制派議員收到請柬後大傷腦筋，擔心佢哋呢頭出席酒會，拉布議員嗰頭喺立法會要求數人，到時分分鐘流會。不過你有張良計，我有過牆梯，據聞建制派決定將議員分成七至八個人一組，到時會分批出發去酒會，一批人返到立法會，另一批先至出發，確保有足夠法定人數留喺立法會，等泛民嘅計謀無咁易得逞喎。