政情：廠商會會董 茅台夾錢買
尋日我哋喺一個活動上遇到中華廠商聯合會（廠商會）前會長施榮懷（Irons），講起廠商會新班子決定唔再大批購入茅台酒供會內飲宴，Irons解畫話，廠商會會董飲飲食食唔係用公款，會內約一百名會董每屆都會夾一筆餐飲費，用作支付每月會董聚餐之用，而會董在聚餐飲用嘅茅台酒，都係用呢筆錢購買。
施榮懷：並非出公數
Irons話，佢做會長時就夾咗六萬元、副會長夾四萬元，常務會董夾三萬元，普通會董就夾兩萬元，筆錢除咗用作聚餐外，的確有用嚟買茅台，另外亦有買紅酒、威士忌，只係數量唔夠茅台咁多。
佢曾經建議買價錢較平嘅「二鍋頭」白酒，但有會董話既然都係飲，點解唔飲好啲，所以就維持買茅台，佢任內未聽過有人不滿飲茅台呢種做法，如果有人不滿，佢一早就煞停唔做喎。佢又透露，自己拎過好多支私伙珍藏茅台畀大家去品嘗，最緊要都係班會董開心。