政情：白鴿剿狄 惹火焚身

為免受累急劃界

話說狄志遠早前就以中央政策組非全職顧問身份獲邀訪京，同全國港澳政策研究會會長陳佐洱、基本法委員會委員饒戈平見面，之後又同政務司司長林鄭月娥會面傾政改。日前佢又喺電台節目中話，感覺到中央難就人大「八．三一」決定有大改動，而民調亦都反映市民接受對政改「袋住先」，認為泛民應該聽吓民意，先接受方案，待二○一九年再重啟政改。

不過，白鴿黨即刻喺社交網站狠批，話對狄志遠嘅言論感到遺憾，十足平時批評高官咁款。該黨老鴿李永達仲揶揄狄志遠唔知係咪想做官，仲上綱上線話狄係北京傳聲筒，一早已經唔當佢係民主派咁話，真係完全唔畀面。其實早喺三年前狄志遠撐政府推行國民教育，搞到白鴿黨備受批評，已有人不滿狄志遠累街坊，所以今次可能為免重蹈覆轍，就急急出聲明同佢劃清界線。

遭質疑逼人退黨

雖然白鴿黨怒插狄志遠，但亦有一批溫和派睇唔過眼，覺得領導層愈行愈激，就算要出聲明都可以淨係話不同意狄志遠言論，唔使用到「遺憾」咁嚴重嘅字眼，質疑係咪想逼人退黨。有資深白鴿黨員甚至質疑份聲明冇諮詢過黨員，又認為白鴿黨要否決政改方案嘅決定都未喺會員大會通過，狄志遠都唔算違反黨紀咁話。

不過，身兼白鴿黨中委兼立法會黨團成員嘅立法會議員黃碧雲就解畫話，黨團有傾過份聲明，黨主席劉慧卿亦都知情，份聲明係由中常委批嘅，佢哋覺得狄志遠嘅言論唔代表黨嘅立場，所以要表態澄清咁話。