中環出更：終身大事 「元秋」叫人嫁住先
剛宣布今年四月卸任民建聯中委嘅立法會議員蔣麗芸（Ann）下嫁老公梁海明十幾年，至今依然恩愛如昔，雖然Ann成日強調自己係獨身主義者，但講到女性嘅人生大事，Ann就放軟態度，話女士們都係目標為本比較好。即係點？Ann舉例話，如果女士目標係三十歲嫁人，限期將至都搵唔到對象嘅話，惟有將就吓「嫁住先」咁話。原來Ann除咗鍾意「袋住先」，仲鍾意叫女士「嫁住先」。
提出「逆向」生涯規劃
除咗結婚，年輕人仲潮興生涯規劃，政府亦積極鼓勵青年創業為將來打算，但Ann就提出「逆向」生涯規劃。佢話當年大學畢業前，已經希望六十歲準時退休，但同時想住千幾二千呎大宅，有車之餘仲要兒孫滿堂兼有工人服侍，每年仲有閒錢去兩轉旅行添。為確保六十歲可以如期達標，Ann更要求自己提早五年儲夠錢，六十歲有車有樓就肯定唔再係夢喇。
不過，Ann貴為蔣家二小姐，以上要求基本上當年一畢業就達標九成，Ann呢個生涯規劃不但夠晒「逆向」，仲相當離地，城中姊妺恨唔到咁多喇！
卓妮