近年興起馬拉松等大型體育活動，港人運動氣氛愈來愈濃。早前灣仔體育總會舉行會所開幕儀式，總會主席林貝聿嘉、會長湯文亮廣邀城中好友到場見證，包括熱愛運動嘅合和集團創辦人胡應湘太太胡郭秀萍及馬會副主席周永健等人，眾人講起做運動，各有喜好。胡太出名係跳得之人，但佢笑笑口話，已冇跳舞一排，最近改為同老公跟教練健身咁話。
講講吓，胡太大爆周永健太太舞功高強，周永健就賣口乖話要開始學跳舞至得，事關佢條腰唔夠靈活，跳唔到韓國潮舞「K-POP」喎！前高官「媽打」李麗娟都有到場，佢近年鍾意跳拉丁風格嘅Zumba舞健身，感覺冇咁容易扭傷手腳，平衡力都好咗。佢見新會所裝修得咁靚，笑稱已約咗好友每個星期都嚟呢度練舞添！
講番新會所，總會早年向政府申請在摩頓臺天橋底設立會所，並獲賽馬會慈善信託基金資助，依家新會所終於落成，梗係開心晒。卓妮見到湯文亮女兒兼仁濟醫院總理湯振玲（Jacqueline）都喺度，Jacqueline除咗熱愛踩單車外，近排仲愛上行山、越野跑步等運動，不過早前就遇上驚慄事件。事關佢同哥哥一齊參加一項慈善越野跑步比賽，兩兄妹接力跑夜晚時段。Jacqueline話，當佢途經馬騮山時，當下四野無人，佢聽到類似猩猩王咆哮嘅聲音，嚇到腳軟，差啲要打電話搵超前嘅哥哥求救喎！
卓妮