前美國總統列根講過，政府唔能夠解決問題，因為政府本身就係問題。真係一啲都無講錯o架。本港房屋問題積重難返，公屋輪候冊人數衝破二十六萬大關，港府口口聲聲話協助市民加快上樓，其實，阻慢市民上樓嘅正正就係佢哋！
係咁嘅，申訴專員公署主動調查公屋租戶審查和監察制度，發現房屋署及房協敷衍塞責，漏洞百出，變相鼓勵濫用公屋，難怪輪候人士等到變長頸鹿喇。舉其中一個個案吖，一名公屋租戶與兒子同住，○三年同長子用「家有長者優先配屋計劃」申請到另一個單位，但無遷出原單位，變成雙重戶籍；更離譜嘅係，戶主一一年調遷第三個單位，房署居然批准另一個兒子以新租約租住原單位，即係一家人霸咗三間屋。房屋官僚咁慷慨，違規租戶梗係多謝喇。
房委會混帳，房協亦唔好得幾多嘅咋。有女戶主與父親租住房協單位，之後與丈夫上到公屋，一年後房協至如夢初醒，要求佢取消戶籍，但講咗就當做咗，從未採取行動，直到佢與丈夫分居，舊年補交離婚證明，房協先至通知房委會將佢嘅公屋戶籍刪除，但女戶主持雙重戶籍已經長達八年。
事實證明，公屋供應捉襟見肘，官僚失職係其中一個主要禍根。正所謂，對違規租戶仁慈，等如對輪候人士殘忍。房屋官僚一方面猛呻無地起屋，一方面坐視霸佔公屋亂象，咁搞法，無殼蝸牛莫講話難以三年上樓，隨時三十年都上唔到樓喇。一葉知秋，港府開口埋口重視房屋問題，根本係大隻講，如果佢哋真係急市民所急，又點會長期任由公屋資源被濫用吖？最好笑嘅係，當局仲死雞撐飯蓋，話要以人性化處理分戶個案喎，結果被申訴專員寸爆，批評當局有法不依，包容變成縱容，對輪候人士不公平。
冇錯嘞，衰咗咪認囉，公屋政策千瘡百孔，都唔係第一次被炮轟嘅喇。呢，所謂嘅富戶政策早就備受詬病，話就話提高租金鼓勵富戶遷出公屋，但係政策寬鬆，又無抽查，實際係鼓勵富戶霸住間屋，令真正有需要人士無法入住。最離譜嘅係，有立法會議員每月袋十幾萬元薪津，依然霸住公屋唔放，簡直唔知個醜字點寫。大家話嘞，濫用公屋成風，房屋困局有乜可能唔雪上加霜吖。
計功夫茶話齋，港產官僚縱容違規租戶濫用公屋資源，呢啲唔係人性化，而係惰性化、劣質化。所以話啫，解決房屋問題，加快覓地建屋固然重要，加快清除官場瘀血更加重要，如果唔係，就算起幾多公屋，都係被人濫用，白白糟蹋嘅咋！