申訴專員公署揭發房屋署及房協縱容租戶濫用公屋資源，導致公屋出現雙重戶籍，最離譜嘅個案係一個家庭霸三個公屋單位。呢件事固然觸動咗市民嘅神經，亦令人聯想起公屋富戶問題，尋日就有讀者翻舊帳不滿立法會議員梁國雄（長毛）長霸公屋仲大條道理。長毛嘅立法會薪津每月逾十萬元，但佢唔租住私樓，反而將啲錢捐晒去社民連，自己就繼續租住廉價公屋，變相要用納稅人金錢補貼佢同社民連。現時香港房屋供應咁緊張，長毛嘅做法難免令人睇唔過眼，房署政策搞到立立亂，睇嚟都要加以整頓吓喇！
