政情：「倒曾小英雄」區選狙擊街工
盲拳打死老師傅從來都有機會出現喺區議會選舉，好似民建聯（民記）年底選舉就計劃派出大量年輕精兵強攻泛民主派地盤。其中一位九十後年輕人李佳斌，積極考慮去葵青葵涌邨中選區挑戰街工主將黃潤達。
20歲李佳斌 讀緊Year 1
咪睇小李佳斌年紀輕輕，佢讀中學時曾經喺一個論壇上狙擊時任特首嘅「貪曾」前特首曾蔭權爵士，仲贏得有「倒曾小英雄」外號，當年佢話志願想做特首，估唔到現時已打算成為區議員，距離理想又近一步。
李佳斌今年五月先夠二十一歲，現時讀緊公開大學政治及公共行政學系一年級，同學民思潮召集人黃之鋒係同學仔，但兩人從未見過面。李佳斌作為一個學生哥，今次一出選就挑戰街工核心主將黃潤達，睇嚟佢野心都唔小。不過，區議會選舉從來都唔係鬥名氣同鬥政見，而係鬥勤力鬥細心，所以後生仔未必輸緊，過往都有勝出嘅例子，但慘敗都有唔少，食粥食飯就要靠自己喇。