政情：旅途防IS 變身執生
回教極端武裝組織伊斯蘭國（IS）大開殺戒，震驚世界。起初只針對「敵國」嘅外國人質，近日火頭燒到亞洲，黃皮膚嘅日本人一樣唔放過，挾持做人質，經常周遊列國豈不是好危險？足迹遊遍超過一百多個國家嘅旅遊作家項明生（James），提起IS兩個字就心寒，為免慘成下一位人質，出門前早已度定幾招傍身。
James尋日連任香港國際旅遊展嘅旅遊大使，少不免同大家分享吓新鮮旅遊見聞。見James一身花綠綠南美民族裝束，佢話件恤衫、披肩加埋條皮帶，全身二十元美金搞掂，抵過着名牌，原來示範緊防綁招數。去得龍蛇混雜國家多，James已曉得入鄉隨俗，每逢去到新地方，佢會嗱嗱臨買番幾件民族服裝，着上身令街坊睇落順眼啲，亦可作為「保護色」，防綁架好奏效喎。
香港人習慣手機不離身，但去到南美，拎部iPhone就唔係好安全。James話，iPhone喺南美只有富豪先拎得起，拎住部金光閃閃嘅電話，同打開個荷包招搖過市無分別。為低調，佢會改拎殘爆嘅國產手機，至於六至七萬元一部嘅德國名牌相機就更加唔好掛喺身，佢又會袋定哨子，遇到危險，就大力吹BB求救。
籲青年跳出「亞太區」
到底用晒以上招數係咪可以避過綁架？James話，總之好過無，當然最穩陣，係呢排少啲去中東國家。不過，James就發現日本背囊友都幾勇，多咗人去戰亂國家探險，細問之下，原來當地政府有失業救濟金，所以青年人寧願辭工，拎住每月約一萬港元救濟金環遊世界，遊遊吓，去咗IS針對嘅目標地都未定。
受惠美元強勢，港人外遊量都唔輸蝕。啱啱做咗份旅遊調查嘅匯眾董事總經理湯錦成話，有八成九人話，今年會照出門去旅行，仲打算花多啲錢添！提及佔領行動，James無話支持定反對，只係話出面大把世界，青年人眼光唔應該只放眼「亞太區」，即係「亞」皆老街同「太」子道西一帶喎，認真識講笑。