中環出更：戴罪頭耷耷 大劉食晏腳軟
華人置業前主席劉鑾雄（大劉）因涉及澳門巨貪案而被澳門初級法院判監五年三個月，佢已申請上訴，但仍未排到期。尋日中午大劉如常去到灣仔富豪飯堂用膳，但見佢面容頗為憔悴，頭耷耷之餘仲不時按住右腳，行路趷吓趷吓，一度要由女兒劉秀融及女友甘比攙扶先落到樓梯，隻腳似乎唔多掂咁喎，唔通擔心單官司所以腳軟軟？
靠阿女攙扶
尋日大劉同甘比一齊坐車去到灣仔富豪飯堂，並由三名保鏢在旁守候。身穿彩色上衣嘅甘比先行落車，戴住眼鏡、面容憔悴嘅大劉則尾隨。我哋見到大劉行路趷吓趷吓，仲不時用手按住隻右腳，上樓梯時更顯得特別辛苦，但甘比就似乎冇留意到，自己一支箭咁飆入飯堂。過咗十分鐘左右，大劉女兒劉秀融玩住手機咁行入飯堂，同佢哋會合。
三人連同秘書大概用咗兩個鐘食飯，喺兩點幾一齊離開。雖然大劉坐咗一段時間，但腳痛情況未有改善，佢落樓梯時一度要靠阿女攙扶，甘比見狀隨即喺旁邊扶住佢。大劉上車時亦好吃力，要慢慢將個身移入車廂，期間阿女一直陪伴在旁，之後上另一架車離開。
卓妮