中環出更：專業人士談經驗論自願醫保
面對公立醫院人手不足、病人輪侯時間長等問題，唔少人選擇自行買保險，於有需要時幫襯私家醫院，省卻煩惱。香港專業人士協會尋日舉行午餐座談會，討論自願醫保建議。青年專業聯盟召集人吳傑莊亦有出席，佢話大學畢業後一直有買保險，有次十字韌帶受傷做手術，亦因此輕鬆應付。佢覺得自願醫保幾吸引，但由於對象定在四十歲以下，佢估計立法會通過後佢已經唔合資格了。
香港專業人士協會副主席陳東岳亦買過保險，可惜索償過一次之後要續保就貴得驚人，連身為資深產業測量師嘅佢都覺得買唔過，好在斷保後勤做運動同搵營養師指導飲食，健康反而比之前好咗。佢認為，自願醫保忽略四十歲以上或退休人士的需要，希望未來可考慮照顧埋呢班人嘅需要。
不過，協會會長簡松年及主席陳建強就明白「羊毛出自羊身上」嘅道理，如果想保額大啲，就相對要畀多啲保費。陳建強透露，曾有親人退休後患病，要住公立醫院大房嘅感受，睇住隔籬床一個一個離開承受心理壓力，又唔希望身邊人負擔咁重，所以佢有能力就買足保險。雖然自願醫保只幫到部分人，但覺得一步一步做起好合理。
難做到保費劃一
簡松年坦言，自願醫保並唔係一個好全面嘅計劃，只係輔助性質，協助部分較年輕或有能力買保險的人轉投私家醫院作治療，減輕公營醫院壓力，而年紀較大的可以繼續於公立醫院求診。
國際專業保險諮詢協會會長羅少雄就話，如果保費劃一會令保險公司好難做，因為唔同人生活習慣或健康情況可以差好遠，風險亦都唔同，覺得政府在收費設定方面或者須再斟酌調整。
卓妮