失信於民拒交代 郵政一味諗縮數

「今時今日咁嘅服務態度,點得o架。」服務行業講求精益求精,顧客至上,呢啲係基本常識,亦係基本要求,偏偏香港郵政不思進取,搞到頻頻見紅,愈窮愈見鬼。「東方報業民意調查」顯示,絕大部分受訪者批評香港郵政得過且過,一味諗縮數,不知所謂。

香港郵政年年虧損早就唔係新聞,審計署亦曾經開腔批評,可惜吖,你有你批評,佢有佢卸膊,經營情況至今未見改善,淨係最近兩個財政年度咋,已經蝕咗逾億元,問你怕未。正常嚟講,知恥近乎勇,郵政官僚應該諗辦法改善服務,增加收入,點知事實啱啱相反,佢哋竟然諗縮數縮短營業時間,你話係咪離晒大譜吖。

雖然話自負盈虧啫,但香港郵政唔係一般商業機構,家陣突然將五十九間郵局嘅營業時間縮短半小時至一小時,大部分郵局下午四點半就關門大吉,擺明搵市民笨喇。正如「東方報業民意調查」顯示,三成五受訪者批評罔顧社會需要;兩成五炮轟違背政府改善公共服務宗旨;兩成四直斥本末倒置。聽到未吖,香港郵政縮短服務時間,只會進一步流失顧客,盞弄巧成拙嘅咋。

最好笑嘅係,香港郵政聲稱租金及人工成本上漲,以致出現虧損,其實,家陣各行各業都面對同樣問題,點解速遞公司開到成行成市,香港郵政就愈做愈縮呢?正如立法會議員話齋,香港郵政大可以加強郵遞包裹服務,配合市民需要嘅啫。講到底,郵政官僚是是但但,敷衍了事,想唔虧損都唔得喇。四成四受訪者批評無與時並進,得過且過;兩成二直斥墨守成規,尸位素餐;另兩成二仲話收費昂貴效率低添。

正所謂,物必先腐而後蟲生,香港郵政不思進取,服務愈做愈差,唔怪得醜聞多多,尤其係涉嫌違法滋擾東方報業集團事件,更加係匪夷所思。香港郵政無厘頭將一批貼足郵資、地址無誤嘅信件退回東方報業,其中有啲信件仲畀人擅自開封,成件事擺明係惡意滋擾同政治打壓,但當局到依家仲未有交代,甚至連一句道歉都欠奉。嗱,群眾眼睛係雪亮嘅,上述調查顯示,四成二受訪者指香港郵政內部管理及營運存在問題;另有唔少受訪者直斥不負責任,想不了了之。

冇錯嘞,香港郵政不務正業,有正經嘢唔做,竟然自甘墮落,充當政治打手,簡直添煩添亂。計功夫茶話齋,為納稅人着想,不如將成個部門摺埋,咁咪唔使再諗縮數囉!