問責高官每周一篇網誌，如果唔係特別有話要講，翻炒舊料堆堆砌砌都在所難免，好似民政事務局局長曾德成最新網誌，主題係「讓社企發展壯大」，要搵番完咗大半個月嘅工展會做例子，話當時有十三家社企擺檔，連網誌配相都係當日工展會嘅相，就知道其實新意欠奉。
同日發表每周網誌嘅財政司司長曾俊華（鬍鬚曾）都唔好得去邊，最新網誌再次主動提到，最近有意見批評佢只照顧傳統支柱產業，唔支持新產業，佢強調唔同意呢啲批評，又話新產業嘅基數小，要發展成支柱產業規模要很長時間。
鬍鬚曾其後話，假設新產業未來廿年保持百分之二十嘅高速增長，其他九成九產業每年平均有百分之三增長，有關新產業於廿年後都只係佔本地生產總值百分之二，同今日嘅支柱產業仍有相當距離。鬍鬚曾與其連番解畫，不如以行動支持新產業，或者更有實際效果。