政情：泛民仁辭建制搶位
民主黨（白鴿黨）立法會議員何俊仁（AV仁）循俗稱「超級區議員」嘅區議會第二界別議席當選，佢早前宣布會喺否決政府政改方案後辭職，觸發變相公投，等選民有機會就此表態，不過喺泛民各黨派你一言，我一語議論之際，建制派陣營亦心郁郁想參加呢場補選，理據係否決政改先辭職嘅時機，已失去變相公投名義，因此只要中央願意「開綠燈」，建制派第二梯隊有能力同「替補」AV仁嘅泛民代表一較高下。
泛民辭職觸發變相公投喺佔領行動期間傾唔成，直至AV仁本月初突然拋出否決政改方案之後辭職，變相發動公投，要求政府重啟政改五部曲，呢個提議一出，唔單止泛民黨派覺得摸不着頭腦，連白鴿黨內部都有分歧。不過AV仁辭職仲未正式上演，建制派對AV仁揚言辭職已經流晒口水，吼住辭職補選嘅一席。
趁機收漁人利
據聞有分析指，如AV仁喺政改表決前發動變相公投，礙於民意壓力同變相承認公投，建制派都唔敢出招，不過依家AV仁計劃喺政改表決後先至辭職，建制派大可當係一場普通辭職補選，既然定性係補選，落場參選又有何不可呢？
再者政改方案一旦被否決，五百萬合資格選民就會失去一人一票選特首嘅權利，到時選民或者會對否決方案嘅泛民有好大反感，建制派分分鐘可以趁住之後嘅補選坐享漁人之利。
泛民人力單薄
除此以外，建制派參加補選嘅人選較泛民為多，事關身為超級區議員嘅AV仁辭職後，必須係現任民選區議員先有資格披甲上陣，泛民方面數來數去都選擇唔多，而且知名度一般，舉例指白鴿黨如要派「中鴿」，估計將會係屯門區議員陳樹英、葵青區議員尹兆堅等之爭，之後就剩返一批等上位嘅「乳鴿」。
建制派方面，黃大仙區議員陳曼琪、沙田區議員潘國山等都係可能人選，特別係身為律師嘅陳曼琪，早前協助團體申請佔旺區禁制令後知名度急升，加上到時得到建制派齊心力撐，AV仁嘅超級議席畀建制派攻陷唔係無機會，不過講到底都要獲中央「開綠燈」，否則就眼白白失去呢個議席進帳嘅黃金機會嘞。