中環出更：何君堯講「依法辦事」被翻舊帳
政治人物最緊要言行一致，否則好易畀人「翻舊帳」，好似尋日一個論壇，一向反佔中嘅律師會前會長何君堯（Junius），不點名批評某啲佔領人士無依法辦事，口口聲聲會自首，但去到警署時又唔配合警方作供，非常賴皮。
新界僭建 曾籲村民咪申報
點知論壇結束後，Junius旋即被人「翻舊帳」，話政府當年呼籲新界有僭建嘅居民向當局自行申報，Junius當時公然呼籲村民唔好申報，質疑Junius同佔領者有關做法有何分別。
就此，Junius辯稱係兩回事，因為每個人都有保持緘默權利喎。
講番尋日嘅論壇，多名嘉賓繼續就政改立場激辯，其中民政事務局前局長藍鴻震建議泛民於政改「袋住先」，原因係港英時代根本無乜民主；公民黨黨魁梁家傑重申唔會就假普選方案「袋住先」，仲話如果係為選票，一早應承咗通過政改。
梁家傑呢個講法認真耐人尋味，言下之意係咪都知民意係想通過政改，佢只係礙於政治立場先至死撐到底呢？
卓妮