中環出更：卿姐向元秋談情「嫁咗畀工作」
民主黨主席劉慧卿（卿姐）曾經有幾段感情，不過從政多年都極少談及私人感情，佢尋日接受立法會議員蔣麗芸（Ann）訪問時，罕有地提到自己表面上無結婚，但從政多年已經當自己嫁咗畀工作同香港嘅福祉，而且當正全香港嘅小朋友係佢嘅仔女。
遇真命天子？「一切隨緣」
阿Ann早前訪問卿姐嘅節目尋日播出，當時阿Ann問及卿姐覺得邊段戀情最刻骨銘心，卿姐起初以唔講私人嘢為由擋駕，但其後先透露有人曾經笑佢已經同工作結婚，又話覺得自己係同香港嘅福祉結婚喎。阿Ann於是繼續追問，話如果卿姐真係遇到真命天子，會唔會接受對方時，卿姐就話自己無乜所謂，一切隨緣咁話。
小肥張同蔣麗芸「搶客」
講開阿Ann，不得不提佢又有新議員辦事處開幕，今次坐落喺啟德德朗邨，仲邀請到一司兩局，分別係財政司司長曾俊華（鬍鬚曾）、勞工及福利局長張建宗（小肥張）同運輸及房屋局長張炳良出席。
其中小肥張致詞時公然同阿Ann「搶客」，話德朗邨人口約有一萬三千幾人，當中唔少係新來港同低收入人士，係當局重要客源之一，呼籲當區居民如果有任何需要，記得要搵政府幫手。
小肥張其後又趁機多謝鬍鬚曾樂意「大開水喉」，令勞福局得以推行一系列幫助低下階層嘅措施。
立法會主席曾鈺成發言時則表示，如果當區居民覺得官員無回應佢哋嘅訴求，可以去議辦搵阿Ann「追數」，又形容阿Ann係最支持政府嘅議員之一，氹到阿Ann不知笑逐顏開。
卓妮