「城門失火，殃及池魚」大家聽得多，咁「立會拉布，殃及漁民」又聽過未？
係咁嘅，經過多番擾攘，成立創新及科技局嘅撥款申請日前終於提上立法會財委會審議，反對派政客揚言會透過休會動議及大量修正案等繼續拉布，務求令撥款無法趕及本財政年度通過而「自然死亡」。雖然當局臨時變招，抽起四項時效性冇咁強嘅撥款申請，「讓路」畀創科局撥款同埋漁業撥款，點知反對派一於少理，照拉可也，卒之搞到連漁業撥款都表決唔到，呢啲咪就係「殃及漁民」囉。有立法會議員就講得啱嘞，家陣唔少漁民等貸款開飯，政客玩還玩，唔好連累無辜；有人更直斥政棍拉布照袋九萬蚊糧冇良心。
咁又係呀，無良政客為拉布而拉布，為反對而反對，只要能夠拖垮施政，遇神殺神，遇佛殺佛，簡直不可理喻，同佢哋講良心，等於與虎謀皮嘅咋。特別係佔領行動失敗後，反對派同政府較量嘅武器剩番所謂「議會抗爭」，仲唔有咁盡玩到咁盡咩。
所以話啫，社會愈來愈政治化，尤其係佔據議事堂嗰班反對派政客，成日搞風搞雨，正經嘢唔做，社會點可能進步吖。好似創科局咁，可以話係好事多磨，現政府上場時已經提出，大大話話拗咗差唔多三年，家陣話就話去到財委會臨門一腳，但反對派肯定唔會就咁收手。嗱，除非財委會主席「剪布」，如果唔係，分分鐘又係煲無米粥都似。
真係諗極都唔明，好似三堆一爐同新界東北發展計劃等政策，就話爭議多多啫，成立創科局係業界以至主流民意所向，咁都要阻撓，你話係咪匪夷所思吖。大家睇吓新加坡、南韓同台灣等周邊地區，近年無不積極推動創新科技產業，包括喺稅收、融資、用地等方面制訂配套政策，搶奪人才。反觀香港，「六大產業」、「做多做闊」等口號固然姿勢大過實際，家陣連成立創科局都係得個噏字，點同人競爭吖？冇錯，成立政策局只係發展科技創意產業嘅第一步，之後嘅協調統籌工作至係真正挑戰，但正所謂「千里之行，始於足下」，如果連第一步都行唔到，講乜都嘥氣啦。
始終都係嗰句，一分耕耘，一分收穫。人哋埋頭苦幹謀求發展，香港就坐而論道蹉跎歲月，再咁內鬥內耗，香港百年繁華遲早毀於一旦，變番一個小漁村嘅咋！