佔領行動後，內地及香港都有唔少指摘香港教育出咗問題嘅聲音，又話青少年唔修讀歷史，好似無根嘅新一代咁。
教育局局長吳克儉尋日出席電台節目時，都被問到呢方面嘅工作，吳得掂好無奈咁呻，無論喺何地，只要係涉及教育嘅問題，教育局局長好多時候都會被點名，即係話，教育局局長個位惹火。
吳得掂咁講，係要回應早前全國港澳研究會會長陳佐洱點佢名，講香港嘅新一代教育工作需要加強，加埋近排港獨風愈嚟愈勁，吳得掂又被人翻國民教育失敗嘅舊帳，佢咪趁機呻兩句囉。只係咁講畀人好卸膊嘅感覺，教育固然涉及好多瓣，但其他政策局都唔少啫？又唔見其他人出來呻被人點名？更何況，吳得掂捱批，又點會淨係因為國教同青少年教育呢？
被問到中聯辦主任張曉明作為香港青少年軍總會嘅榮譽贊助人，是否有內地插手香港事務之嫌，吳得掂就話，本港嘅透明資訊可以畀外界知道內地係咪插手香港事務，佢仲反問，張曉明支持有關團體有何不妥喎！