中環出更：李文俊籲青年一路向北
施政報告宣布成立青年發展基金，裝備年輕人創業，由城中二代精英成立嘅百仁基金亦響應政府號召，協助年輕人向上流動，除咗以銀彈資助學生參加考察，更着重鼓勵佢哋訂立清晰人生目標。百仁基金主席兼理文造紙創辦人李文俊（Raymond）話，年輕人應該考慮北上就業，皆因內地經濟增長持續快速，大把工作機遇，分分鐘好景過香港。
經已成立六年嘅百仁基金早前舉行新一屆董事局就職典禮，Raymond冧莊主席，做過百仁主席嘅恒基副主席李家傑同施榮忻亦到場助陣。
陳稼晉勤摸門獲「機」遇
基金主打青年發展，對年輕人嘅需要及心態都知悉一二。曾任機師嘅副主席陳稼晉（Patrick）話最緊要有決心，佢透露當年向全球航空公司同飛行學校寄咗二百幾封求職信，只得三間有回音，最後更食白果，但Patrick再摸門應徵，兩年後終於獲聘接受航空訓練，所以佢勉勵年輕人唔好輕言放棄。副主席羅詠詩就笑言，有傳政府想搞青年舞會消耗年輕人精力係唔實際，基金會多啲向青年分享創業點滴喎。
香港藝術發展局主席王英偉嘅歌手兒子王梓軒（Jonathan）亦現身，佢認為青年向上流動係全球性問題，年輕人唔應該覺得被社會欺壓，最重要係自我增值。佢鼓勵年輕人嘗試創業，事關依家只要一個網站、電話就可以開公司，創業成本唔高，唔似以前受租金、人工影響咁話。
卓妮