如果話最危險嘅地方就係最安全嘅地方，咁最安全嘅地方應該就係最危險嘅地方喇。好似流感咁，好多人以為唔係乜嘢大病，唔需要太過緊張，其實，流感雖然唔係大病，但隨時可以奪命o架。
唔係嚇你，衞生防護中心數字顯示，去年初嘅冬季流感高峰期共錄得二百六十六宗嚴重個案，奪去一百三十三條人命；而今年啱啱過咗二十日多啲，就錄得七十幾宗嚴重個案，其中三十多人死亡，淨係過去一星期就有二十幾人死於流感，問你怕未！
點解今次流感死亡率咁高？專家係咁講嘅，由於病毒出現「抗原漂移」，基因轉變，令流感疫苗嘅效用大打折扣，只剩兩成幾功效，預料呢輪流感高峰期會持續到三月底，喺農曆新年前達到頂峰。講到底，皆因世界衞生組織錯判流感趨勢，令疫苗未能針對目前最流行嘅H3N2「瑞士型」流感病毒，導致世界各地好似不設防咁，香港更加被害到雞毛鴨血。
呢，自從進入流感高峰期之後，公立醫院就日日逼爆，搞到七國咁亂。前日整體急症室求診人數達到六千八百幾人，遠遠多於非高峰期嘅五千幾人；至於整體內科病床嘅佔用率，更達到百分之一百一十三，其中伊利沙伯及將軍澳醫院分別達到百分之一百二十三及百分之一百二十一。
係人都知，公立醫院本來已經百病叢生，問題多多，加上流感高峰期殺到，病房超晒負荷，想唔出事都幾難。醫管局最新報告顯示，前年十月至舊年九月，總共錄得四十九宗嚴重醫療事故，較對上一年增加近一倍，仲創下有紀錄以來最高添。淨係手術後遺留物料喺病人體內嘅烏龍事故就有二十宗，有位病人手術後兩周至被發現體內留有膠針嘴等物料，你話係咪離譜吖？話時話，遺留物料喺病人體內已經發生過無數次，但始終改善唔到，證明醫管局嘅管理幾咁混亂。最好笑嘅係，該局自己都承認係沉痛教訓，仲話要重點研究點樣改善添。可惜，有人信至得o架！
唔怪得有人話，以前係生不入官門，死不入地獄，家陣係生不入公院，死不入地獄。港府每年撥畀醫管局嘅資源唔算少，弊在該局資源錯配，肥上瘦下，搞到前線人手長期短缺，醫療設施殘殘舊舊，醫療事故無奇不有。當局年前係威係勢成立醫管局檢討督導委員會，話要全面改革公共醫療體系，點知到依家仲係無聲無息，睇怕又係不了了之咯。冇法子喇，官僚靠得住，豬乸會上樹，大家唔想入公院受難，最緊要自求多福，尤其係面對流感高峰期，千祈要保重吖！