有啲詩文，特別惹人解讀，好似李商隱嘅一首五言絕句：向晚意不適，驅車登古原；夕陽無限好，只是近黃昏。歷來，騷人墨客，對這二十個字特別有Feel，也許「人生苦短」是人類的共通點，是以劉禹錫用積極樂觀的態度，以正能量寫道：莫道桑榆晚，為霞尚滿天！而朱自清亦步劉禹錫之後，認為「但得夕陽無限好，何須惆悵怨黃昏」，前輩指這是「抒情與通感的藝術」！
老朽並非忽然詩興發作，而係有感於有啲詩文特別惹人遐思；而現實中，一樣不乏呢類例子；點解咁講呢？不是嗎？好似東方報業集團咁，特別惹政府各部門「關照」，不過，相信就唔係「抒情與通感的藝術」，而係別有一番不可告人嘅企圖，否則多年來正義傳媒惹來消防處、衞生署、食環署、警務處、淫審處、平機會……輪流上陣，「假調查真騷擾」昭昭明甚，而最不可思議嘅就係連郵政局都慌死怕蝕底，唔上來沾吓報界宗師《東方日報》嘅旺氣，就好似會冇運行咁！否則點會好似啲變態佬、戀物狂咁，偷人制服內衣底褲來過吓手癮，之不過香港郵政就偷拆人哋啲信而已！
香港郵政涉嫌亂拆東方寄出之郵件，事後雖曾派員到東方了解，可惜拖延兩個半月依然如泥牛入海，調查了無進展。呢個世界，唔通拖得多就可以笑呵呵瞞天過海，當乜事都冇發生過，香港郵政若然連道歉都冇聲又唔肯交代事件真相，唔好話東方，即使老朽都會對佢口誅筆伐！
香港郵政唔知係唔係想知點解東方何以一紙風行，連續三十多年銷量冠軍？若然，都唔使出到「偷窺」呢招，好簡單啫，東方向以鋒利之筆，寫忠厚之文，不畏權勢，為民發聲，贏得讀者喝采，就係咁簡單，香港郵政唔好再咁低莊，偷窺搵真相喇！