政情：任建峰辭職 律師會再起波瀾
去年已經多風多雨嘅香港律師會再掀波瀾，律師會憲制及人權事務委員會委員任建峰去年成功向前會長林新強提出不信任動議後，尋日突然再喺社交網站高調宣布即時辭任委員會委員。原因係該委員會日前加入咗四位成員，改善長期委員不足情況，而佢亦做咗委員超過九年，係時候改變吓。不過，佢亦同時放風話好快再有新計劃推出，莫非今次辭職只係煙幕？
傳與其他委員道不同
憲制及人權事務委員會向來火花四濺，凡涉及政改諮詢等《基本法》涵蓋嘅爭議都歸呢個委員會討論，該委員會日前新增四名成員，包括反佔領行動嘅前會長何君堯、現任副會長彭韻僖、陳曉峰及Amirali Nazir。有傳任建峰因為「道不同」無意埋堆，所以宣布退出，費事被委員會言論「代表」自己，但傳聞仍然有待證實。
不過，任建峰早前都坦認同屋苑居民成立地區組織「美孚家．政」宣揚民主訊息，據知佢嘅新計劃係再與約四十名年輕律師同大狀組隊成立「法政匯思」，表明會就政改等社會議題發聲。究竟佢葫蘆裏賣咩藥，最快下周就揭盅。