政情：今日你上鏡：局長大熱？楊偉雄封口

立法會財務委員會有意喺年中盡快通過創新及科技局（創科局）撥款，令醞釀多年嘅創科局終於有機會「出世」。坊間盛傳係創科局局長熱門人選嘅理工大學行政副校長楊偉雄，尋日出席學校活動時繼續成為追訪焦點，但佢就耍手擰頭唔肯透露半句同政府有關嘅嘢。問佢係咪準備返新工時，佢都依然封口，唔通佢擔心創科局會臨尾甩轆，所以唔敢咁老定？雖然楊偉雄咁口密，但遇啱尋日活動係講「社會創新及創業發展基金」，佢上到台就大讚特首剛發表嘅《施政報告》有提及青少年流動同科技發展，真係同政府啱晒嘴形。