古人話，窮則變，變則通，通則久。做人係咁，做生意更加係咁，如果唔識變通，不思進取，盞愈窮愈見鬼嘅咋。呢，香港郵政就係最佳反面教材喇，由於經營不善，頻頻見紅，佢哋唔係諗辦法改善服務，增加收入，反而諗縮數減少營業時間，你話係咪本末倒置吖。
係咁嘅，香港郵政最近突然喺網站刊出一則訊息，聲稱為求更有效運用資源，其中五十九間郵局營業時間將於下月二日起調整。究竟點樣調整呢？原來唔係增加服務時間，而係提早關門，每日縮減營業時間半小時至一小時。以位於中西區嘅皇后大道郵政局為例，平日由早上九時半至六時營業，下月二日起將提早一粒鐘於下午五時關門。其餘受影響郵局多數提早半小時收工，瀕臨倒閉嘅黃大仙竹園郵局除咗縮鐘，而且逢星期三休息添。你話嘞，今時今日咁嘅服務態度點得o架！
正如有人質疑，香港郵政提早關門，罔顧市民返工及放工時間，只會愈縮愈衰；有關注團體更直斥香港郵政同政府改善公共服務嘅承諾背道而馳。冇錯嘞，香港郵政話就話以營運基金模式自負盈虧啫，但作為公共服務，首先應該考慮市民需要，而唔係以所謂「有效運用資源」為理由，一味諗縮數。再講吖，縮短營業時間只會進一步流失顧客，豈不是弄巧反拙？
即係咁，家陣愈來愈少人寄信，呢個係事實，但與此同時，速遞服務嘅需求不斷增加，呢個亦係事實，私人速遞公司開到成行成市，反而香港郵政斯人獨憔悴，都唔知好笑定好嬲。好明顯，郵政官僚尸位素餐，根本冇做好自己份工。商務及經濟發展局局長蘇錦樑話喎，郵政局虧損嘅原因係營運成本持續上漲，營運收入未能抵銷上漲嘅成本。
嗱，呢啲咪叫卸責囉。香港郵政墨守成規，不思進取，港產官僚唔查找不足，反而以成本上漲為擋箭牌，問你服未。試諗吓，依家邊個行業唔使面對成本上漲吖？人哋速遞公司愈開愈多，而香港郵政就愈玩愈縮，咁又點解釋吖？淨係過去兩個財政年度咋，香港郵政就累積虧損過億元，搞到郵局執吓一間又一間，員工炒完一批又一批，士氣低落，服務插水，卒之爆出「失信於民」嘅醜聞。
係人都知，叢林法則，適者生存。隨着時代進步，人類生活習慣改變，新事物不斷出現，舊事物自然會面臨生存危機。所以，如果香港郵政唔識得與時並進，繼續得過且過，只會愈玩愈縮，愈縮愈衰，遲早遭到淘汰，到時想唔關門都唔得咯！