政情：林新強話當年 玩樂化敵意
香港律師會轄下有個康樂及體育委員會（康體會），專為會員辦業界體育比賽、家庭同樂日、本地或海外美食品嘗等活動，依家已有超過五百名會員喇。原來康體會係由律師會前會長林新強（Ambrose）喺十年前成立嘅。Ambrose透露，因為當年律師會會員關係並不緊密，會員對律師會可能仲會懷有一啲敵意添，所以希望成立康體會修補大家關係咁話。
律師會規則嚴 會員易反感
今個月嘅香港律師會會刊訪問咗Ambrose，佢喺訪問中細訴成立康體會嘅經過。Ambrose話，律師會負責監管本地律師，當年操守規則執得十分嚴謹，就算係輕微或技術性違規都唔會寬容或彈性處理，所以會員對律師會可能會懷有一啲敵意添。Ambrose就諗計，希望透過運動修補大家嘅關係。
不過，康體會嘅成立並唔係一帆風順，令籌組過程遇到阻力。Ambrose話，除咗初期活動參與人數不多外，最難嘅就係向理事會爭取撥款，經過多年努力才將難關一一克服。唔知難唔難得過政府向立法會申請撥款呢？