港區人大代表吳秋北日前話計劃喺人大、政協兩會期間建議將《國家安全法》納入《基本法》附件三，等《國安法》可以適用於香港。不過，同樣係港區人大代表嘅立法會議員田北辰（田二少）就表明唔支持吳秋北嘅提議，覺得《基本法》二十三條已經可以處理對國家安全嘅威脅，仲鬧吳秋北以《國家安全法》取代二十三條簡直係「藥石亂投，頭痛醫腳，有啲莫名其妙，不知所謂！」咁話。田二少仲寸爆吳秋北，話唔信三十六個港區人大之中會有太多人支持有關提議喎。
