政情：建制狙擊泛民雙料議員
自從今屆立法會引入「超級區議員」，令區議員一席變得奇貨可居，○一年區議會選舉就引來唔少政治明星參選，但唔少都「氹仔浸蛟龍」，所以咪話容易選。話咁快，今年十一月又到新一屆區議會選舉，據聞唔少現時任職區議會同立法會嘅泛民主派雙料議員，都會成為建制派狙擊對象，雖然單睇牌面，大部分就似係竄擾居多，但難保一個唔小心輸咗，呢班雙料議員隨時變成「雙失」。
對撼老手 搶位唔易
三個泛民雙料議員係民主黨（白鴿黨）胡志偉、新民主同盟范國威及街工梁耀忠。呢三位都係區會老手，次次都大勝對手，建制派要搶位都唔係咁容易。不過，建制派有嘅係人才及資源，其中工聯會（工記）就派人狙擊胡志偉同范國威。胡志偉係黃大仙瓊富區議員，多年來都係區議會票王，工記有意搵當區居屋居民、社區幹事黃鎮健出選。
泛民超選存暗湧
另一工記社區幹事高永聯就挑戰范國威嘅西貢運亨選區議席，睇番原來高永聯○三年仲係民協成員，三次挑戰區選落敗，佢當時話民協係「民主派嘅二奶」，唔知係咪咁樣，所以決定轉投工記呢？至於梁耀忠嘅葵青葵芳選區，就係由「無國界社工」會長、勞聯陳萬聯應打硬仗。不過，有建制中人話，其實呢幾個區係「豬頭骨」好難贏，如果贏咗就真係繼工聯小花劉桂容撼贏李卓人後又一突破。
至於今屆泛民嘅三席「超級區議員」，包括白鴿黨何俊仁（AV仁）、涂謹申及民協馮檢基嘅形勢又點呢？AV仁已表明心迹唔選立法會，睇怕區選都無心戀戰，隨時仲提早辭職添；阿基就遇到工記小花陳穎欣挑戰；而阿涂上屆喺油尖旺奧運選區，只係贏咗自由黨劉啟傑百幾票，但劉啟傑決定「搵真銀」唔再參選。
不過，操盤人最近就有意派出當區組織「共建奧運主題社區大聯盟」幹事挑戰阿涂，暫時傾向以獨立身份掛名，密密做地區工作，一向被指疏於地區工作嘅阿涂，就要醒醒定定喇！