政情：中環出更：陳茂波：區會阻唔到我
特首在施政報告話明熟地唔夠，要大力開發土地，但改劃土地用途時經常遇到反對聲音，希望市民權衡輕重，否則好難增加土地及房屋供應。發展局局長陳茂波尋日去電台開咪，講到明區議會只係諮詢機構，就算反對都唔會影響改劃土地用途，城市規劃委員會（城規會）先至係法定機構，所以就算區議會反對，政府照樣可以向城規會申請喎。如果係咁，區議會係咪要摺埋呢？
城規會先係法定機構
陳茂波又話，好多時區議員面對選區附近土地改劃，都要求加番啲社區設施，但有時啲要求唔合理，會盡量睇吓做唔做到，啲意見應該吸納就吸納。言下之意，吸納唔到都冇辦法。不過，佢都補口話區議會對改劃土地用途仍有否決權，到時城規會作為「獨立」機構，會考慮晒各方意見，做對社會最合理決定。陳茂波對城規會咁有信心，大家都預期到結果會係點啦！
運輸及房屋局局長張炳良都有去另一個電台節目，談及依家香港樓價同工資差距冠絕全球，港人負擔好大。被問到有冇五歲小朋友向佢關心房屋問題，張炳良笑言自己個孫五歲幾，仲未關心到呢方面喎。
卓妮