政情：中環出更：張宇人炒飯嘆孭鑊之苦
廚房工作辛苦，以致青年人唔願入行，係飲食業普遍頭痛嘅問題，因應呢個現象，有公司就研發自動化爐具嚟協助業界。立法會飲食界議員張宇人（Tommy）、叙福樓集團執董黃傑龍（Simon）、名廚黃永幟、餐飲聯業協會副主席黃浩鈞都有去觀摩吓啲現代化爐具，仲拎起鑊鏟試用自動拋鑊機。不過，Tommy下廚露兩手之餘，亦藉住個鑊嚟講下自己喺議會嘅處境，仲講到要孭鑊添！
財委會主席 「特別難做」
Tommy話，對住個鑊不外乎係炒鑊、拋鑊同孭鑊，身為立法會議員就好多時都要孭鑊！因為喺强勢主導嘅政治環境當中，衰嘢梗係留畀議員，尤其係佢身兼財務委員會主席，呢個位特別難做，例如啱啱通過極具爭議嘅三堆一爐之後，又即將要面對周五嘅創新及科技局撥款申請。佢預期當日嘅討論可能會相當激烈，所以要考慮下使唔使買定個鋼頭盔以防有人掟嘢喎！
Tommy講講吓議會工作又乘機解畫，話十多年嘅議員生涯之中，幾乎逢周三都係捨議會而赴馬場，因為佢嘅選民都集中喺馬場，所以佢去馬場只係做好選民工作喎。如果係咁，Tommy真係夠晒勤力，批評佢掛住跑馬嘅人，就真係怪錯咗佢囉！
講番今次爐具示範，自稱入廚房多數係搵食，而非煮食嘅Tommy，廚藝當然生疏，但因為有自動拋鑊機，就只須留意食材落鑊嘅分量同次序，所以炒飯都算似模似樣。至於Simon試用拋鑊機之後都話效果唔錯，仲話要將今次嘅炒飯作品帶返屋企同老婆品嘗。黃浩鈞就話，餐飲業需要去借助科技來營運，肯定就係大勢所趨。
卓妮