一年一度嘅渣打馬拉松本周日開跑喇，本來呢，呢個活動搞得有聲有色，成為國際矚目嘅體壇盛事，係好值得高興嘅，尤其係佔領後百廢待興，渣馬仲有沖喜作用添。可惜美中不足嘅係，本港空氣污染嚴重，港府又減排無方，搞到跑手被迫做人肉吸塵機，點止醜死人吖，仲分分鐘可能跑死人o架。
嗱，可能環保署都知衰啩，今年首次聯同城市大學特別為馬拉松發布空氣質素健康指數，比賽當日會喺賽道設置四個空氣質素監察站，開跑前及比賽途中實時發放各路段嘅空氣質素情況。當局話喎，呢套指數同現有嘅空氣質素健康指數計算方法一樣，目的係為跑手提供數據，及早做好預防準備，量力而為咁話。
明眼人一睇就知，呢套指數話就話係為跑手健康着想，其實同免責聲明冇乜分別，擺明卸膊啫。講起都醜死怪，渣馬發生過唔少事故，繼○六年跑出人命後，三年前亦有一名跑手暴斃，仲有近四十人送院添。搞成咁，空氣質素欠佳絕對係原因之一。好似馬拉松終點站銅鑼灣咁吖，連日來空氣污染指標爆晒燈，當局唔係努力改善空氣質素，淨係一味提供數據，根本係本末倒置咋。萬一好嘅唔靈醜嘅靈，今年又再搞出人命，盛事變憾事，咁就大件事嘞。
冇計喇，港府搞環保不嬲大隻講，跑手惟有自求多福喇。冇冤枉o架，好似前年推出嘅新空氣質素健康指數咁，話就話取替沿用近廿年嘅舊指數，但標準寬鬆到冇朋友，莫講話跑輸世衞標準九條街，甚至連內地都不如。仲有呀，當局聲稱二○二○年要達到新空氣質素指標水平，點知又係翻兜更換柴油車、重組巴士路線等舊橋，來來去去三幅被，證明黔驢技窮。最諷刺嘅係，當局資助石油氣的士及小巴更換國產催化器，點知更換後廢氣不減反增，簡直愈幫愈忙。
講開又講，係人都知燃煤發電係空氣污染嘅元兇之一，當局增加潔淨能源比例無可厚非，最近仲拋出向內地買電同埋增加天然氣發電比例嘅方案畀市民討論添。不過咁，今時今日咁嘅政治環境，唔止反對派興風作浪，中港矛盾仲愈演愈烈，當局要推行呢啲方案，講就容易做就難咯。
一日最衰都係前特首貪曾，佢老哥當初好大口氣話想要一支魔術棒，順手一畫就畫出藍天白雲，結果藍天白雲就冇嘞，烏煙瘴氣就有。貪曾被列為「空氣逃犯」被人通緝，到家陣都未伏法，你話嘞，香港空氣點可能有改善吖？喺烏煙瘴氣下參加馬拉松，簡直就係搵命博，唔驚出事就假。