佔領行動凸顯港府喺青年政策方面，仍有好大進步空間，施政報告雖然提出斥資三億元成立「青年發展基金」，資助青年創業，但外界質疑呢啲措施治標不治本。據聞有政府中人最近不斷對外「收風」，了解有乜活動可以吸引到後生仔參加。不過，由於佢哋仲係用舊思維嚟諗問題，搞到諗出嚟嘅建議都係咁「老餅」。
據聞有見唔少後生仔都鍾意追星，有政府中人就建議當局請啲明星嚟表演，等啲後生仔排住隊追星而唔走去佔中。
不過，唔知係咪部分高官年紀有番咁上下，佢哋口中嘅明星仍然停留喺九十年代嘅「四大天王」，即黎明、張學友等人，擺明就唔知道依家啲後生仔已經熱捧韓國明星、台灣明星等。
即使有部分官員知道青年追星嘅口味，建議一旦搞活動時要邀請明星，應該請番啲三十歲以下嘅明星表演，但有人就擔心啲明星嘅年紀太輕，上台表演可能會亂講嘢，到時就唔知點收科，認真係進退兩難喎。