政情：田二少邊抱孫女邊放狗

做得立法會議員就要有心理準備要犧牲私人時間，亦有議員識得忙裏偷閒，其中半年前榮升外公嘅新民黨田北辰（田二少），尋日就帶同精靈可愛嘅半歲大孫女去海邊玩，順便拖埋隻狗仔散步，不過又要抱孫女又要拖住隻狗，認真唔容易，田二少話全靠有個「孭帶」，可以近距離同孫女接觸，又可以騰空兩隻手出嚟，一路抱孫一路帶狗仔散步，享受微暖陽光，吹住陣陣海風，田二少其後又話應該頒個發明獎畀發明「孭帶」嘅人，聲稱當年佢做爸爸時，都唔見有呢種設計。