中環出更：「港大飯堂」重開 校友話當年

四十名港大校友尋晚雲集莎厘娜，場面好似返回幾十年前咁熱鬧，出席者包括前經濟發展及勞工局局長葉澍堃、港大前校長徐立之、上訴庭副庭長楊振權，前特首高級特別助理路祥安等人，據知本來另一著名港大校友、前財政司司長梁錦松都話出席，但突有要事未能赴會。

講番當年曾經唔食學生餐嘅學生，據講該人就係商務及經濟發展局前局長馬時亨（肥亨），佢作為莎厘娜常客，尋晚仲帶埋太太捧場。肥亨回想當年讀書時成日走堂，正當佢諗住畀其他人鬧時，點知佢太太竟然「出口」護航，話依家唔少商界成功人士，以前讀港大時都有走堂，大讚肥亨當年已有膽識走堂。

餐廳創辦人王叔（左）同細仔王宗俠。	有「港大飯堂」之稱嘅莎厘娜重新開張。	徐立之話近年愛上飲威士忌。

葉澍堃成煲湯帶走

葉澍堃尋晚現身時，竟然帶住個大煲走入餐廳，原來佢同兒子都好鍾意飲莎厘娜嘅羅宋湯，次次都要拎走一大煲至滿意。

徐立之則自爆讀書時唔愛飲酒，但近年愛上威士忌，仲話飲酒係必需要嘅社交技巧，至於點解獨愛威士忌，佢就話一枝公好難飲晒一支紅酒，但開咗唔飲晒又好易變，所以寧願轉飲威士忌，放工後返屋企輕酌一杯就啱啱好。

卓妮