治病救人，最緊要對症下藥，否則隨時弄巧反拙嘅咋。呢，香港用緊嘅流感疫苗，原來已經失效，根本預防唔到變種病毒，問你怕未！
係咁嘅，世界衞生組織舊年二月預測即將流行嘅流感病毒品種，係俗稱「德克薩斯型」嘅甲型H3N2流感，點知最終流行嘅原來係變種甲型H3N2「瑞士型」流感。有研究發現，用現時疫苗對抗「瑞士型」流感，整體效用只有兩成三，壯年同長者保護力更加不足兩成。最好笑嘅係，食物及衞生局局長高永文呢頭承認疫苗唔能夠有效針對變種流感，嗰頭又話疫苗仲有一定保護作用，都唔知佢究竟想表達乜嘢。
話時話，呢隻變種流感來勢洶洶，唔講得笑o架。今年過咗十幾日咋，本港已接獲四十一宗成年人嚴重流感個案，其中十人死亡，幾乎平均一日死一個，當中就有超過九成感染「瑞士型」流感。有學者警告，病毒變種加上疫苗組合唔脗合，疫情比往年嚴峻，特別係重災區嘅美國，同香港一樣處於北半球，香港萬一被波及，後果不堪設想。所以話，世衞亂點鴛鴦，簡直靠害。
冇計喇，港府聽咗世衞支笛買錯疫苗，都算係無妄之災，依家最緊要亡羊補牢，一方面留意疫苗研究最新進展，另一方面做好防疫工作。你知啦，依家係流感高峰期，急症室日日逼爆，私家診所亦大排長龍，有醫生話流感病人比平時急增一倍。試諗吓，家陣太平時勢，醫療系統已經超負荷踢晒腳，萬一疫潮殺到仲得了嘅。
正所謂，屋漏偏逢連夜雨，家陣多疫拍門，又點止變種流感咁簡單吖。好似禽流感咁，唔單止不斷變種，仲遍地開花添，江西、福建、山東等地相繼中招，台灣九個縣市淪陷，連日本都走唔甩；至於其他好似新沙士、伊波拉等疫症，仍然虎視眈眈，港府到底有咩應變措施呢？
講到應變措施，想唔擔心都唔得。早排本報記者巡視多個播毒高危地點，發現唔少地方嘅防疫措施根本形同虛設，例如管制站無要求旅客除帽量體溫，又例如公立醫院升降機冇定時消毒。疫症兵臨城下，衞生官僚唔係瞌眼瞓，就係懶懶閒，你話係咪匪夷所思吖。
始終都係嗰句，黃台之瓜，何堪再摘。今日香港七國咁亂，烏煙瘴氣，萬一再爆發疫症，當年沙士慘劇隨時重演o架！