前晚十一點幾，政府新聞處突然公布，特首、行政會議非官守議員同所有問責官員會加人工，但新聞稿唔提「加薪」兩字，只係話薪金水平回復至○二年或○九年水平。呢個涉及公帑嘅決定咁重要，竟然接近凌晨時先至公布，做法十分鬼祟。勞工及福利局局長張建宗尋日出席活動時就辯稱，前日立法會剛剛通過公務員加薪，政府想順勢調整政治問責官員薪酬，以免同常任秘書長薪金差距愈嚟愈窄。雖然咁講都啱嘅，但令人費解嘅係，呢個消息早幾個小時或者等翌日天光後至公布唔得咩？
