政情：泛民拉布玩死自己
自從泛民喺佔領後期宣布進行議會不合作運動後，講到明會樣樣嘢都拉布，初期係威係勢，不過最近就陸續浮現反效果。好似被拉布拖咗近九個月嘅公務員加薪議案，前幾日終於喺泛民投降下通過咗，十幾萬公務員可以一次過(才豆)幾個月「欠薪」當花紅，但一班無得追溯加人工嘅政府資助機構員工，尤其是津校老師同社工，就唔知幾時有得加，得個恨字。偏偏呢兩大界別係泛民最大票倉，唔知今次泛民算唔算玩殘自己呢？
公僕本月底出「新糧」過肥年
泛民早前喺立法會財委會大拉布，令公務員加薪議案遲遲未通過，公務員早已怨聲載道。早前又傳出泛民抵受唔住十幾萬公務員嘅壓力，終於肯棄械投降，同政府傾掂數會加快審議財委會議案。結果一如傳聞所料，泛民喺上周五財委會閃電通過公務員加薪議案。
由於公務員加薪被拖咗九個月，所以可以追溯番咁多個月嘅加薪幅度，喺農曆新年前一筆過出，真係肥過肥仔水。不過有人歡喜有人愁，公務員事務局局長鄧國威講到明，公務員可以喺月尾出「新糧」，但資助機構員工就未必可以，現階段仲需時核實資料，政府會促請資助機構盡快向員工出「新糧」。
葉建源張國柱恐成眾矢之的
咁就大件事喇，因為資助機構之中好多係津校老師同社工，呢啲界別向來屬於泛民鐵票，早前唔少老師擔心無人工加，經已出聲敦促立法會盡快通過加薪議案，現時政府講明有機會延遲資助機構員工加薪，立法會教育界議員葉建源同社福界張國柱，會唔會成為眾矢之的呢？
呢個世界最怕人比人，依家造成咁樣嘅局面，試問資助機構員工又點可能冇怨氣呢？立法會嘅直選議員如果缺乏民意支持，就好似一架無入油嘅跑車咁，好難跑贏其他人。但民意可以隨時逆轉，如果入錯油都唔知，分分鐘搞到火燒後欄。經過今次事件，睇怕泛民見過鬼都怕黑，下次未必再敢亂打拉布戰喇！