中環出更：黃之鋒歎早餐 「賴低」CY
學民思潮召集人黃之鋒日前出席電台節目後，同政務司司長林鄭月娥狹路相逢，成功狙擊對方，唔知係咪食過翻尋味，之鋒尋日再拉隊攔截出席電台節目嘅特首梁振英（CY），不過今次佢冇獲邀上電台，只好呆站示威區望住CY座駕車尾燈食塵，後來索性同學民仔離場食早餐，直至CY離開都冇返過嚟，真係有頭威、冇尾陣。
示威者仲少過警員
曾經話過CY冇資格同學民對話嘅之鋒，尋晚漏夜通知傳媒話要拉隊狙擊佢，大班警員如臨大敵，未夠八點已埋位應戰，點知學民仔數埋都唔夠十人，警員仲多過示威者。後來CY嘅座駕駛至，眾人高叫口號，又要求CY面對學生，可惜CY無落車陪佢哋玩。之鋒可能覺得自討無趣，於是去咗食早餐順便收隊散水，一場「晨操」鬧劇就咁結束。
CY話肯同泛民交流
至於CY就喺電台節目趁機向泛民伸出橄欖枝，話願意同泛民就政改以任何形式交流，希望泛民唔好杯葛離場。同樣講過唔會再同CY對話嘅泛民陣營、立法會議員梁家傑即時轉軚話願意對話，但前提係要修訂人大嘅政改決議，即係講都嘥氣。
卓妮